5.10.2007

Në kuadër të projektit “Si ju dhe shkolla juaj mund ta luftoni diskriminimin”, u mbajt gara shkollore për esenë më të mirë. Çmimi i parë me vlerë prej 100 euro ju dha nxënëses Venera Gashi nga Shkolla e Mesme “Bedri Pejani” në Pejë, çmimi i dytë ju nda nxënëses Njomëza Doçi nga Shkolla e Mesme e Mjekësisë në Pejë, ndërkaq çmimi i tretë i takoi Enkeleta Ibishit, nga SH.M. ”Luigj Gurakuqi” në Klinë

Njësia për të drejtat e njeriut në MASHT në bashkëpunim me OSBE – në, gjatë muajit   kanë realizuar projektin “Si ju dhe shkolla juaj mund ta luftoni diskriminimin”, në kuadër të cilit u mbajt gara shkollore në ese.    

Drejtuesit e kësaj gare thanë se ky aktivitet ka për qëllim promovimin e idesë kundër diskriminimit dhe ngritjen e vetëdijes së nxënësve dhe arsimtarëve për t`i kontribuar ndërtimit të një shoqërie të shëndoshë dhe të aftë për kultivimin vlerave të qytetarisë.

Në këtë solemniteti Këshilltari i Ministrit të Arsimit, Defrim Gashi tha :”fjala diskriminim gjithnjë e më shumë po futet qëllimisht në fjalorin ton të komunikimit, për tua bërë me dije të gjithëve se kuptimi i kësaj fjale nuk duhet të ketë vend në këtë shoqëri. Ndërkaq kjo garë si dhe punimet tuaja japin të kuptojmë se ju jo vetëm që e keni kuptuar në esencë termin diskriminim, por e keni filluar ta luftoni atë në formën dhe mundësin tuaj kreative”, tha z. Gashi në praninë e nxënësve fitues dhe të pjesëmarrësve të tjerë. Më pas, z. Gashi nxënësve pjesëmarrës u tha se punimet e tyre mund tu shërbejnë si model për gjeneratat e reja në përpjekjet e përbashkëta për një jetë të denjë, të barabartë e të qetë për të gjithë në Kosovë dhe kudo. “Ministri Agim Veliu në vazhdimësi përgëzon nxënësit e dalluar si ju  si dhe inkurajon ata për punë të mëtutjeshme për të mirën e tyre dhe të vendit”, tha në fund z. Gashi.

Me këtë rast, Drejtori i Departamentit të Arsimit Parauniversitarë Agim Berdyna tha se MASHT në plan programet dhe tekstet shkollore i ka dhënë hapësirën e duhur çështjes  së diskriminimit, kultivimit të ndjenjës së respektit, tolerancës  dhe të bashkëjetesës.

Ndërkaq shkrimet konkurruese në këtë garë flasin për shpirtin fisnik dhe human të gjeneratës së re por edhe të kulturës dhe traditës së popullit tonë tha z. Agim Berdyna. 

Të pranishmit i përshëndeti edhe znj Melissa Stone, Udhëheqëse e Njësisë për të Drejtat e Njeriut në OSBE dhe këshilltare në ZKM e cila përgëzoi njësinë për të drejtat e njeriut në MASHT e në veçanti udhëheqësit e garës dhe tha se pa dyshim që Kosova ka një rini të shëndoshë dhe perspektiva e sajë është e shndritshme.

Ndërkaq znj. Merita Jonuzi, Zyrtare për të drejtat e fëmijëve, nxënësve dhe studentëve tha se kjo garë dhe mesazhet që nxënësit kanë dhënë në shkrimet e tyre dëshmon vlerat e popullit tonë i cili në shpirt nuk është diskriminues ndaj askujt, në asnjë kohë dhe në asnjë rrethanë .

Në garën për esenë më të mirë u prezantuan 41 punime, ndërkaq çmimi i parë i parë me vlerë prej 100 euro ju dha nxënëses Venera Gashi nga Shkolla e Mesme “Bedri Pejani” në Pejë, çmimi i dytë ju nda nxënëses Njomëza Doçi nga Shkolla e Mesme e Mjekësisë në Pejë, ndërkaq vendi i tretë i takoi Enkeleta Ibishit, nga SH.K ”Luigj Gurakuqi” në Klinë .